Hunosa trabaya na tramitación urbanística pa producir hidróxenu verde nel Pozu Fondón

Trelce mineros reciben les medayes d'Hunosa

Hunosa trabaya na tramitación urbanística pa producir hidróxenu verde nel Pozu Fondón. El proyectu acaba de recibir 4,2 millones del Ministeriu de Transición Ecolóxica.

Anunciólo güei'l presidente de la hullera pública, Gregorio Rabanal, na entrega de les medayes de Santa Bárbara. Nesi mesmu actu, el secretariu xeneral del SOMA, José Luis Alperi, foi optimista respecto al futuru d'Hunosa.

Como cada avientu per Santa Bárbara, Hunosa apurrió les medayes d'antigüedá a los sos trabayadores. Anguaño a 13 mineros d'El Batán, Ayer, Sueros y Posminería.

Lleven na hullera pública ente 18 y 25 años, desenvolviendo llabores nel interior o esterior de les mines. Dalgunos sienten esta reconocencia como un homenaxe tamién a los sos familiares muertos desenvolviendo esti llabor. L'actu cuntó coles actuaciones del gaiteru Hevia y el Coru Mineru de Turón.