IU vota mañana a los sos candidatos y la so apuesta electoral pa les xenerales

Ramón Argüelles, Ángela Vallina y Carmen Conde disputen el lideralgu

La militancia d'IX d'Asturies ta llamada mañana a una triple consulta pa que nome a los sos cabeces de llista a les elecciones autonómiques y xenerales y pa que se pronuncie, dientro d'una votación de calter federal, si apuesta por una coalición con Podemos pa los comicios al Congresu, daqué yá refugao pa les rexonales.

Anque los esfuerzos fechos dende l'actual dirección rexonal pa tratar de consensuar una llista única pa treslladar una imaxe d'unidá tres l'abandonu de la coalición por parte de Gaspar Llamazares, finalmente son tres los candidatos que disputen el lideralgu nes elecciones autonómiques.

Na consulta, la militancia va tener qu'escoyer ente l'actual coordinador xeneral, Ramón Argüelles, la eurodiputada Ángela Vallina y la conceyala avilesina Carmen Conde.

Argüelles encabeza la candidatura "Sumar pola izquierda", na que tán presentes el diputáu rexonal Jaime Gareth Flórez; la conceyala uviedina Cristina Pontón; l'alcalde de Mieres, Aníbal Vázquez, o'l coordinador de Xixón, Faustino Sabio.

La eurodiputada Ángela Vallina preséntase a les primaries cola llista "Más Izquierda Xunida", de la que formen parte los parllamentarios rexonales Ovidio Zapico, María Josefa Miranda y Marta Pulgar o l'ex-coordinador d'Avilés, Fernando Díaz Rañón, y cola qu'aspira a representar a quien sofita la necesidá de caltener un proyectu autónomu pa IX.

La tercera ye la conceyala avilesina Carmen Conde, que se presenta sol lema "Ye agora, l'Asturies que queremos", qu'inclúi a dirixentes como Raúl Gayo Rodríguez, María Cristina Tuya Amenedo, Eder Fonseca y Ana Solís, y representa a la corriente más próxima a les tesis de la dirección federal d'IX, partidaria d'una mayor confluencia con Podemos.