IX reclama un gran pactu social pol mediu rural

El sociu de gobiernu nel Executivu autonómicu nun dirá a la celebración relixosa en Cuadonga'l 8 de setiembre

Izquierda Xunida-Convocatoria por Asturies plantegó esti miércoles la necesidá de roblar un gran alcuerdu social pol mediu rural énte los problemes de financiación que tienen abondos ayuntamientos pa dar servicios a una población cada vegada menor y más avieyada.

El coordinador xeneral d’IX, Ovidio Zapico, xunto a los alcaldes y diputaos de l’alianza na Xunta Xeneral del Principáu aconceyaron güei pa poner les bases y entamar un plan de trabayu que dexe zarrar esti mesmu añu un alcuerdu pal mediu rural asemeyáu al que los axentes sociales y económicos lleven alantre dende va décades cola concertación social.

Según l’alcalde de Morcín, Maximino García, con una población cada vegada más avieyada y que mengua col pasu los años, los ayuntamientos cada vegada tienen menos ingresos pa dar servicios y atender les necesidaes de los sos vecinos con recursos propios.