Javier Cívicos y Andrés Ibarra trabayen pa producir aguacate n'Asturies

Aspiren a consolidar un modelu ecolóxicu d'esti cultivu

Dos mozos vecinos de Cabranes propunxéronse daqué que, nun principiu, podría paecer una llocura: producir aguacate n'Asturies. Pel momentu, tán consiguiéndolo porque les plantes que semaron nuna finca cabranesa yá florien, y la próxima primavera van entamar a producir la fruta na finca d'Esperimentación Aguacastur.

Javier Cívicos, d'orixe vascu, punxo la tierra y Andrés Ibarra, d'orixe andaluz y con esperiencia nesti cultivu na Costa del Sol, onde se produz dende va décades l'aguacate, punxo toles sos conocencies.

Dende va dos años, non solo curien una plantación d'una hectárea y media, tamién asesoren y xestionen otres esplotaciones. El consumu d'aguacate nun para de medrar. De fechu la demanda supera en siete puntos a la ufierta, y ye un productu mui valoráu nel norte d'Europa.

Pa garantizar la collecha, tien que plantase en finques cercanes a la mar, onde nun se dean xelaes, y con un suelu que nun tenga muncha folla. La meyor comparanza son los cítricos. Otra peculiaridá del aguacate asturianu ye que, pese al mugor y la pluviosidá de la rexón, hai qu'instalar sistema de riegu.

Cumpliendo con toos estos encamientos, estos dos mozos entamadores aseguren una producción de, polo menos, 60 quilos por árbol nun mínimu de 20 años. L'aguacate podría convertise en toa una revolución pal campu asturianu.