Javier Fernández llama a aprovechar la recuperación pa potenciar la industria

Más de 130 empreses de 34 países participen nel Foru Sector Metal Asturies

El presidente del Principáu, Javier Fernández, llamó güei a aprovechar la recuperación económica pa "ampliar les oportunidaes de negociu" de la industria, yá que de la so fortaleza "depende en mui buena midida" el "porvenir económicu" d'Asturies.

Fernández faló asina na inauguración en Xixón del V Foru Sector Metal Asturies, nel que participarán en tres díes más de 130 empreses de 34 países.

L'alcuentru, organizáu pola Sociedá de Promoción Esterior del Principáu (Asturex) cola collaboración de la patronal Femetal, llevará alantre más de 1.500 entrevistes ente les 65 empreses asturianes participantes y les compañíes importadores del restu de países.

Fernández conseñó que'l Foru quier "amosar les capacidaes de les empreses asturianes del metal y atrayer proyectos industriales d'altu valir añadíu".

Pa ganar en "competitividá", Fernández mentó qu'habrá qu'apostar pola anovación, la nomada industria 4.0 y les cadenes globales de valir p'aprovechar les "ventayes comparatives" coles que cuenta'l sector asturianu.

El xefe del Executivu subrayó que la industria, y en particular la del metal, ye "angular" pa consolidar el desarrollu d'Asturies pola so capacidá tractora, la so aportación al valir añadíu, el potente dinamismu qu'afita o les rentes que xenera.

Por ello, afirmó que "Asturies necesita más y meyor industria" pa "facer más fuerte" el sistema productivu, anque almitió qu'hai que cumplir "con toles exixencies que seyan afayadices" en materia de seguridá llaboral y ambiental.

El Gobiernu asturianu, dixo, "cree compatible, obligatorio y compatible, siguir llevando alantre la medría de la industria col cuidáu medioambiental".

"Nun afloxaremos en nengún d'esos estremos, nun vamos cayer nesa irresponsabilidá. Tola vixilancia, tol control y tol rigor son compatibles con tol sofitu al crecimientu industrial", defendió Fernández, qu'avanzó que, amás de rematar la revisión de los planes de calidá del aire d'Avilés y Xixón, l'Executivu intentará consensuar con 16 conceyos el protocolu pa situaciones anómales.

Amás, destacó la buena evolución de la industria asturiana, qu'en 2015 apurrió'l 20,49% del valir añadíu brutu rexonal, un 3.69% más que l'añu anterior, y qu'en 2016 menguó l'empléu un 5,7% y aumentó la ocupación un 1,86%, acordies cola EPA, datos más favoratibles que los de la media nacional.

El sector asturianu del metal ta iguáu por 1.100 empreses qu'ocupen a unes 32.000 persones y apurre'l 11% del PIB rexonal, con una cifra de negociu superior a los 5.400 millones.

Amás, les empreses venceyaes al metal xeneren el 67% de les esportaciones d'Asturies, valoró Fernández, que güei tuvo acompañáu del nuevu conseyeru d'Empléu, Industria y Turismu, Isaac Pola, que mañana tomará posesión del so cargu de manera oficial.

Na inauguración participaron tabién los presidentes de la Federación d'Empresarios del Metal y Afines del Principáu d'Asturies (Femetal), Guillermo Ulacia, y de la Cámara de Comerciu de Xixón, Félix Baragaño; amás del primer teniente de alcalde de la ciudá, Fernando Couto, y la directora d'Asturex, Teresa Vigón.

Ulacia consideró que la esportación de bienes industriales "ye un focu d'esperanza" pa "superar los desafíos" de la coxuntura caracterizada por "baxos niveles de medría del PIB, aumentu de la delda pública, elevaos niveles de desemplegu y medría de la desigualdá".

El presidente de la patronal del metal valoró la evolución del sector nel primer trimestre d'esti añu, con una actividá productiva qu'esperimentó un aumentu del 7,4% respecto al mesmu periodo del añu anterior.

Esti datu confirma la tendencia de medría del exerciciu de 2016, con una media añal del 2,5%, según esplicó Ulacia.

Amás, destacó que les esportaciones de les empreses del metal n'Asturies aumentaron nel primer trimestre un 27,4% interañal, hasta 655,4 millones d'euros.

Tamién destacó la medría del empléu nel sector, con un 8,05% de xuba nestos tres primeros meses del añu, superando la cifra de 32.200 trabayadores.

"Estos datos nun son consecuencia del azar, tán sofitaos nel emburrie y inversión empresarial y nel dinamismu del nuestru ecosistema, arriquecíu por un perfil empresarial heteroxeneu con una alta capacidá d'adaptación", conseñó.