Javier Fernández nun volverá a optar a la Secretaría Xeneral de la FSA

Llegó per primer vegada a la Secretaría Xeneral del PSOE n'Asturies en payares del añu 2000

Javier Fernández nun volverá a optar la Secretaría Xeneral de la Federación Socialista Asturiana. Según pudo saber TPA Noticies, el presidente del Principáu comunicará esta tarde a la Executiva de la FSA la so decisión definitiva de nun presentase al cargu nel viniente congresu de los socialistes asturianos que, previsiblemente, va facese en setiembre.

Javier Fernández llegó per primer vegada a la Secretaría Xeneral del PSOE n'Asturies en payares del añu 2000 y revalidó nos tres congresos siguientes.

Esta ye la so segunda llexislatura al frente del Executivu asturianu y dende'l pasáu mes d'ochobre ye tamién presidente de la xestora del PSOE, cargu qu'acaba'l mes de xunu, cuando'l Congresu Nacional ratifique al nuevu Secretariu Xeneral Pedro Sánchez y a la so nueva executiva.

Dempués de 17 años al frente de la Federación Socialista Asturiana, decide nun volver a presentase. Una intención que yá dexare cayer dalguna vegada, pero que fai definitiva tres les primaries socialistes del pasáu domingu nes que n'Asturies los partidarios de Pedro Sánchez algamaron 900 votos más que los qu'apoyaben a Susana Díaz.