Javier Fernández reclama xunión política pa revertir la decisión de zarrar Alcoa

El presidente del Principáu atribúi la falta d’alcuerdos a un Podemos "desnortiáu"

El presidente del Principáu, Javier Fernández, pidió güei alcuerdos cola oposición, a pesar de la cercanía de les elecciones, pa zarrar con un pactu presupuestariu una llexislatura "más erma que fértil" marcada por un "desnortiáu" Podemos que vía nel desgaste del Gobiernu’l so meyor aval pa medrar.

Fernández fizo esta llamada al diálogu nel discursu de 24 páxines y pronunciáu en 48 minutos col qu’abrió’l que sedrá l’últimu debate de la rexón nel que participe, porque en mayu dexará l’actividá política dempués de siete años de mandatu.

Dempués d’abrir la so intervención con un recuerdu pa los trabayadores d’Alcoa y reclamar unidá institucional y política pa evitar el pieslle de la factoría d’Avilés, el xefe del Executivu recordó qu’en tres años namái s’aprobó un presupuestu, col sofitu de PP y Ciudadanos, y que la falta d’alcuerdu de los demás nun foi gracies nin al so gabinete, nin al so partíu, nin a IX nin a sindicatos o patronal.

Asina, insistió, añu tres añu los llamamientos al consensu, les negociaciones y les cesiones tropezaron "cola negativa de Podemos" qu’optó por una estratexa "propia del qu’escueye ser enantes un alversariu electoral qu’un aliáu políticu p’atender les necesidaes de los asturianos".

A pesar d’estes crítiques, que llevaron al voceru moráu, Enrique López, a afirmar que Fernández "odia a Podemos", el xefe del Executivu pidió a esta formación que, como fizo a nivel nacional, asuma renuncies en pro del consensu y intente aprovechar lo que queda de llexislatura en defensa de los intereses d’Asturies.

"La llexislatura nun ta acabada y la mio obligación -y la de so- ye aprovechala, saca-y partíu hasta l’últimu minutu", solliñó.

A xuiciu de so, cualquiera que siguiere’l diálogu ente Podemos y el Gobiernu central comprobaría qu’hebo episodios de tensión, aproximaciones y alloñamientos hasta l’alcuerdu final, "daqué normal nun procesu de negociación" y qu’ocurre siempre que se negocia "con voluntá d’alcuerdu y disposición al entendimientu".

Al marxe de la cuestión presupuestaria, la intervención de Fernández tuvo marcada pola situación d’Alcoa y del conxuntu de la industria asturiana énte los planes de transición enerxética del Gobiernu central que nun deben dar llugar, a xuiciu de so, "una industria más llimpia" a costa de "llaminar" la esistente, sinón qu’esi oxetivu debe algamase dende "meyorar" la d’anguaño.

Dempués de solliñar que la responsabilidá sobre Alcoa "recái dafechu" na dirección de la empresa, el presidente asturianu alvirtió de que la política enerxética ye siempre una cuestión d’Estáu y nun mercáu global les empreses escueyen les localizaciones más favoratibles pa los sos intereses "y p’aquelles que consumen muncha electricidá’l costu de la enerxía ye un factor decisivu".

Asina, nuna economía como l’asturiana na que’l pesu de la industria asítiase nel 20,4 por cientu del PIB a pesar de les reconversiones sufríes, Asturies tien que tar atenta a la transición enerxética que se plantega y non sólo en defensa de la minería.

La descarbonización "pactada, progresiva y non apresurada" que reclama, apuntó, busca defender trabayu nes térmiques y el tresporte, caltener el tráficu de graneles d’El Musel y evitar una medría del preciu de la enerxía qu’arriesgue la competitividá de la industria.

Nel so discursu, Fernández refirióse tamién a la reforma estatutaria promovida por Podemos y IX pa inxertar la oficialidá del asturianu y pa la que "nun ye’l momentu afayadizu" al ser "una xera seria que necesita más ingredientes que l’oportunismu".

Tamién reiteró’l so pidimientu de que se reforme’l sistema de financiación autonómica enantes de les elecciones xenerales por mor de que nun intúi "tiempos meyores" pa ello y solliñó que, "llegáu’l casu", habrá que facelo "participen o non" los independentistes.

Dempués de comprometese a llevar "más p’allá" en cuantes a afitamientu y detalle l’alcuerdu a nivel nacional ente’l PSOE y Podemos pa impulsar les escueles infantiles de cero a tres años, el xefe del Executivu llamentó, en materia d’infraestructures, que l’alianza promovida n’Asturies nun tenga más respaldu políticu "por un amiestu d’oportunismu, mieu a pactar y subordinación política"

Nesti ámbitu amosó la so confianza "sincera" en que’l presidente del Gobiernu, Pedro Sánchez, cumpla’l so compromisu d’acabar proyectos como les obres de la Variante de Payares en 2020 y que s’abra con tráficu mistu de mercancíes y pasaxeros.

D’esi compromisu formen parte tamién la meyora de les cercaníes ferroviaries, el plan de víes de Xixón y recuperar l’Autopista del Mar, apuntó dempués de considerar "lóxiques" les crítiques d’usuarios y oposición pola falta d’enllaces aéreos internacionales.