Kanjo, el programa desarrolláu por Jonathan Blanco que detecta situaciones d'acosu

Ye quien a analizar les emociones de menores n'edá escolar allugaos yá en centros de toa España

Inxenieru de software y economista, Jonathan Blanco llevaba 12 años trabayando xunto con otru entamador en dellos proyectos tecnolóxicos. Fai cuatro, dieron vida a Kanjo, un programa informáticu d'intelixencia artificial p'analizar nos colexos y institutos l'estáu d'ánimu de los escolinos y detectar situaciones de vulnerabilidá, como por casu, casos d'acosu o bullying.

El programa traza patrones de conducta analizando seis emociones y fai saltar una alarma si esi patrón concuerda con una situación de riesgu. Nel proyectu participa un equipu d'inxenieros y de psicólogos infantiles.

L'oxetivu principal ye rebaxar los tiempos de detección de casos de sufrimientu infantil. 40.000 escolinos de toa España usaron Kanjo nos últimos años. El programa va allugase proximamente en cinco colexos públicos y concertaos d'Uviéu.