L'Archivu Históricu, l'edificiu públicu más grande d'Asturies

L'inmueble, que data de 1907, foi l'antigua Prisión Provincial d'Uviéu

Un total de 114 años tien l'edificiu d'usu públicu, xunto con La Llaboral, más grande de tola rexón: l'actual sede del Archivu Históricu. Un inmueble qu'enantes d'acoyer la hestoria documentada d'Asturies, foi l'antigua Prisión Provincial d'Uviéu.

Foi'l primer edificiu n'España n'usar formigón armao pa la so construcción. Diseñóse siguiendo'l patrón de la Cárcel Modelo de Madrid.

Con capacidá pa 140 reclusos, la cárcel empezó a dar serviciu en 1907, con 120 homes y 20 muyeres, anque nella llegó a haber 2.400 presos tres la Guerra Civil.

A pesar de cambiar radicalmente la función pa la que foi creáu, l'edificiu caltien practicamente intacta la so estructura orixinal: cinco galeríes de tres pisos onde s'allugaben les celdes; la gran cúpula central; unu de los dos murios perimetrales; y cuatro garites de vixilancia. Una d'elles llámase la Garita del Diablu porque delantre d'ella, hasta 1938, fusilaron a los condergaos a muerte.

En 1993 clausúrase l'inmueble. Y de 2005 a 2009 rehabilitóse p'acoyer l'Archivu Históricu. Anque l'edificiu vaciose per dientro, caltuvo la so esencia. Les galeríes de celdes guarden agora los depósitos de documentos.

Guardaos toos ellos en más de 300.000 caxes, l'archivu cunta con 10 trabayadores en plantiya. Zona alministrativa, sala de consulta, salón d'actos y aula didáctica.

Amás de la custodia de documentos, equí entámense esposiciones, presentaciones de llibros o xornaes de puertes abiertes, y visites guiaes pa conocer, por casu, cuatro celdes ambientaes en cuatro periodos hestóricos distintos, que recreen los oríxenes d'esti singular edificiu que, dende 2003, ye Bien d'Interés Cultural.