L'Arzobispáu denuncia al Conceyu d'Uviéu pola casa rectoral d'El Naranco

Tomó esta decisión énte'l "silenciu alministrativu" del Consistoriu

La batalla ente'l Conceyu d'Uviéu y l'Arzobispáu pola casa rectoral asitiada n'El Naranco llega a los tribunales. L'Arzobispáu presentó un recursu énte'l Xulgáu de lo Contencioso escontra'l Serviciu de Patrimoniu Cultural y escontra el Consistoriu por refugar la llicencia pa restaurar esa vivienda.

Fuentes del Arzobispáu aseguren que tomaron esta decisión énte'l "silenciu alministrativu" que, dende va dos años, reciben al so pidimientu de rehabilitar l'edificiu. La so intención ye volver pidir la llicencia d'obres.

En 2017 pidieron reconvertir la casa nuna vivienda unifamiliar ensin conseñar si yera pa usu priváu o relixosu. El consistoriu valtó esi pidimientu por considerar qu'atentaba escontra una redolada protexida: la contorna de Santa María del Naranco y Samiguel de Lliño, dambos Patrimoniu Mundial de la Unesco.