L'Asociación Nuevu Ventanielles refuga'l nuevu diseñu pal Bulevar de Santuyano

El proyectu pa la entrada a Uviéu nun acaba colos problemes de contaminación, tráficu y separtación ente barrios

L'Asociación Nuevu Ventanielles refuga'l nuevu diseñu proyectáu pol Bipartitu d'Uviéu pa remocicar el Bulevar de Santuyano, la entrada a Uviéu dende l'A-66. Consideren que'l planteamientu nun acaba colos problemes históricos de contaminación, ruíu y tráficu d'esta zona, nin tampoco cola barrera urbanística que supón l'autovía pa los barrios que tán estremaos por ella.

Creen que ye un diseñu que nun cunta cola participación vecinal y piden volver al proyectu anterior, canceláu cuando PP y Ciudadanos llegaron al Gobiernu local.

Unu de los elementos que menos convencen en Ventanielles del nuevu diseñu del Bulevar de Santuyano ye la pasarela colgante, curva y atirantada, proyectada al altor del barriu de Guillén Lafuerza.

Tampoco la glorieta amorfa na que se va convertir el nuedu de la Cruz Roja.

Los nuevos planes pa la entrada a Uviéu, opinen, nun acaben colos vieyos problemes de contaminación, tráficu y separtación ente barrios. Tampoco cumplen colos requisitos de los fondos Edusi que financiaríen la obra, sobre manera no tocante a la participación ciudadana.

Otros elementos, como la sienda peatonal que va dir dende'l Palaciu de los Deportes hasta la pasarela colgante, apunten, solo van sirvir pa perpetuar la barrera ente barrios que supón l'autovía.

La so idea ye recuperar l'anterior proyectu del Bulevar, por ser, al so entender, muncho más integrador y cuntar col preste de les asociaciones vecinales.