L'Audiencia Provincial recuerda a Natalio Grueso que ye un prófugo

La Sección Tercera da respuesta a un burofax que'l director xeneral de la Fundación Niemeyer unvió a la Sala

El tribunal de la Sección Tercera de l'Audiencia Provincial recordó al ex-director xeneral de la Fundación Niemeyer, Natalio Grueso, al traviés d'una providencia, la so situación procesal, como prófugu, por tener pendiente una orde de busca y captura, en respuesta a un burofax qu'unvió güei a la Sala.

Los maxistraos incorporaron el burofax a les actuaciones "nes mesmes condiciones nes que llegó", ensin abrir, según informó'l Tribunal Cimeru de Xusticia d'Asturies (TCXA).

Esti burofax unvióse malapenes unes hores dempués de que'l mesmu tribunal de l'Audiencia dictara una providencia pola qu'esclariaba al abogáu d'oficiu, José René Alperi, que l'escritu d'arrenuncia a la defensa del ex-director xeneral tenía que presentase énte'l Colexu d'Abogaos.

Esta ye la segunda vegada que Natalio Grueso queda ensin abogáu, a les puertes del xuiciu, énte les "discrepancies irreconciliables" qu'alegaron les sos defenses pa siguir representándolu.

El tribunal acutó pa la celebración de la vista oral de la causa, que contién 20.000 folios, dende'l 24 de setiembre al 11 d'ochobre y a lo llargo de les sesiones un centenar de testigos propuestos van prestar declaración.

Natalio Grueso, sobro'l que pesa una orde de busca y captura y otra de ingresu darréu en prisión una vegada que seya alcontráu, encara un pidimientu fiscal d'once años por supuestes irregularidaes na so etapa al frente del complexu cultural avilesín.

El fiscal acusa al ex-director xeneral de delitos siguíos de malversación en concursu medial con falsedá, otru societariu y un terceru d'insolvencia punible.