L'Institutu Cervantes, abiertu a ufiertar cursos en llingua asturiana

Luis García Montero recuerda qu'una de les obligaciones de la institución ye "l'espardimientu de les llingües del Estáu español"

L'Institutu Cervantes "ta abiertu" a ufiertar cursos en llingua asturiana nos centros que tien distribuyíos per tol mundu, señaló’l so director, Luis García Montero, dempués de recordar qu'una de les obligaciones d'esta institución ye "l'espardimientu de les llingües del Estáu español" y que, poro, tien "la obligación de tar abiertu" a cualquier propuesta.

García Montero preside la xunta de directores del Institutu Cervantes qu'entamó güei en La Llaboral de Xixón, y que siguirá mañana martes, n'Avilés, cola presencia de la reina Letizia, y el miércoles n'Uviéu.

Nuna rueda de prensa na que tuvo acompañáu del director xeneral d'Acción Cultural y Normalización Llingüística del Principáu d'Asturies, Antón García, alvirtió que la cooficialidá del asturianu ye una cuestión que tien que resolvese enantes nel parllamentu asturianu y llueu nel español, pero que'l Cervantes nun fai distinciones nesi aspectu a la hora de promover cursos y acciones d'espardimientu.