L'acusación de Foro xube a 13 años el pidimientu de cárcel pa Natalio Grueso

Señala como responsable políticu de les irregularidaes a Areces

L'acusación popular de Foro xube a 13 años de cárcel el pidimientu pa Natalio Grueso poles presuntes irregularidaes cometíes na so etapa como director del Centru Niemeyer.

Nel so escritu de calificación entama afondando na responsabilidá política. Señala al ex-presidente Vicente Álvarez Areces y responsabilízalu del nomamientu de Natalio Grueso y de les atribuciones de les que, diz, disfrutó pa desarrollar el proyectu. Por ello, piden que declare como testigu nel xuiciu.

Pa Foro, Natalio Grueso aprovechóse de la dexación de funciones del Patronatu de la Fundación.
Considérenlu responsable de los delitos de malversación, falsedá documental y delitu societariu.

Irregularidaes que, Foro conseña, nun podría llevar alantre ensin la collaboración necesaria del trabayador de l'axencia de viaxes pal que piden ocho años de cárcel, los mesmos que la Fiscalía.

Caltién igual pena que'l Ministeriu Públicu pa la ex-muyer de Natalio Grueso, dos años y mediu, y pa Marc Martí, un añu y mediu.

Amás, xube a tres años, frente a los dalgo más de dos que pidía la Fiscalía, la condena pal que fuera secretariu de la fundación José Luis Rebollo.

Nel so escritu Foro conseña que les cuentes añales de la Fundación dende 2007 y hasta 2010, que fueron aprobaes pol Patronatu, nun amosaben la realidá del centru Niemeyer. Fueron manipulaes, ocultando'l volume de gastu real, asina como la delda.