L'acusada de matar al so ñácaru de 53 puñalaes en Xixón declárase culpable

Refugó responder a les entrugues tanto de la so defensa como de la Fiscalía y de l'acusación

La moza acusada d’asesinar al so ñácaru recién nacíu de 53 puñalaes en Xixón en 2019 declaróse culpable na primer sesión del xuiciu con tribunal de xuráu qu’acueye dende esti llunes l’Audiencia Provincial d’Uviéu.

La moza, que nel momentu del cometer el crime tenía 27 años, respondió con un "sí" cuando-y entrugó la maxistrada si se declaraba culpable, dempués de que’l so abogáu defensor diere anuncia na sala de la intención de la procesada, que tamién respondió afirmativamente cuando-y entrugaron si lo facía de forma llibre y ensin presiones.

L’acusada, que tuvo cola cabeza agachada, refugó responder a les entrugues tanto de la so defensa como de la Fiscalía y de l’acusación, exercida pola so pareya daquella, que desconocía que tuviere embaranzada, de forma que la vista siguirá mañana cola práctica de les pruebes testificales y periciales.

Los fechos fueron el 1 d’agostu de 2019, cuando l’acusada, que taba sola na so casa del barriu xixonés de Nuevo Roces, parió al ñácaru.