L'acusáu pola muerte de Carragal asegura que nun-y pegó na cabeza

Diz que nel momentu de los fechos taba so los efectos del alcohol

L'acusáu de provocar la muerte del profesor pixuetu David Carragal con una fuerte patada na cabeza nel barriu uvieín de La Florida, en 2019, aseguró esti llunes que "ye inocente" y, tres almitir que taba borrachu, afirmó que la víctima amenazólos a él y a los sos amigos "con raxalos", polo qu'él "solo quería emburrialu y salir corriendo".

L'Audiencia Provincial acoyó esti llunes la primer sesión del xuiciu con xuráu, nel que la Fiscalía pide once años de prisión pal acusáu, Jorge C.C., por un delitu d'homicidiu, mientres que l'acusación particular xube'l so pidimientu a 16 años por asesinatu.