L'albergue d'El Salvador, n'Uviéu, rexistra caldía una media de 35 pelegrinos

L'Asociación Asturlleonesa d'Amigos del Camín urxe al treslláu d'El Salvador a les Pelayes

El branu ye la dómina del añu con más pelegrinos pelos caminos. N’Uviéu, l’albergue municipal d’El Salvador, rexistra caldía de media más de 35, y nun ye l’únicu de la ciudá.

La cifra global ye más difícil de saber porque munchos de los qu’entamen el Camín na catedral uvieína nun duermen na ciudá. El d’Uviéu ye un casu especial: ye l’orixe de los caminos y l’entamu del Primitivu, pasu del Camín del Norte o de la Costa y meta del Camín d’El Salvador.

Los pelegrinos españoles que más vienen son catalanes. De fuera, franceses sobre manera, alemanes, italianos o belgues. Marietta Junele, fizo’l camín va nueve años y llegó hasta Villaviciosa. Ellí retomólu estos díes.

Pa l’Asociación Asturlleonesa d’Amigos del Camín, les rutes xacobees tienen una salú escelente y agradecen que l’Orixe del Camín protagonice les campañes turístiques.

L’Asociación Asturlleonesa d’Amigos del Camín urxe al treslláu del albergue d’El Salvador a les Pelayes

Los planes pal treslláu del Albergue municipal d’El Salvador, n’Uviéu, del edificiu del Seminariu al Conventu de les Pelayes ta avanzáu y namás s’espera la solución de dalgunos problemes, que nun comentó.

Eso aseguren dende l’Asociación Asturlleonesa d’Amigos del Camín, qu’alministra l’Albergue y espera que’l Director de Patrimoniu puea aprobalu bien llueu.

Pa la so presidenta, son necesaries instalaciones más modernes y l’asitiamientu del Conventu de San Pelayo, xunto a la Catedral, sedría l’afayadizu porque ye’l llugar onde s’axunten los caminos Primitivu, del Norte y de San Salvador.