L'alcalde d'Ayer y dellos miembros del consistoriu declaren pola Operación Hulla

Los pescudamientos céntrense nes presuntes irregularidaes que dexaron la construcción de la residencia

La UCO de la Guardia Civil toma declaración, na operación Hulla, al actual alcalde d'Ayer, a una ex-conceyala, a la ex-secretaria y a dellos técnicos del consistoriu.

Los pescudamientos de la UCO céntrense nes presuntes irregularidaes urbanístiques que dexaron la construcción del xeriátricu de Felechosa. Quieren saber quién tomó la decisión y si dalgún miembru de la corporación cobró dineru pa dexalo pasar.

Especial enfotu faen nel fechu de que l'entós alcalde, Gabriel Pérez Villalta, avocase les competencies pa dexar el movimientu de tierra (nel terrén nel que se construyó'l xeriátricu) cuando cuntaba con un informe técnicu a la escontra.

Pérez Villalta inda nun foi citáu a declarar. La que fuera conceyala de Turismu aseguró énte los investigadores que tanto Villalta como l'entós conceyal d'Urbanismu y agora alcalde, David Moreno, recibíen presiones por parte de Postigo pa que-y concedieren tolos permisos que necesitaba la obra. David Moreno nególo na so declaración.

Nesta investigación, l'ex-xerente del Institutu del Carbón aseguró que'l cambéu del decretu que dexó la construcción de la residencia vieno impuesta dende'l Gobiernu socialista de Rodríguez Zapatero.