L'archivu de Cangas caltién documentos dende'l sieglu XVIII

Documentos relevantes de la hestoria local y de los habitantes del conceyu

Un padrón de fidalguíes de 1787 ye'l documentu más antiguu que curia l'Archivu Municipal de Cangas. El más recién pue que seya de güei, porque hasta equí llega tola documentación que produz el Conceyu, amás d'otra serie de donaciones de particulares y asociaciones.

Equí recíbenla, clasifiquen y curien, asegura Marta Veiga, archivera municipal de Cangas.

La organización del archivu cangués llevóse alantre nel añu 2000. Dende entós, allúgase nun local cercanu a la Casa Conceyu, que cunta con 380 metros lliniales d'estanteríes apinaes de la hestoria del conceyu.

Dende equí ponse de nuevo a disposición de l'alministración cuando la necesite, pero tamién abierta a cualquier investigador o ciudadanu. Consultes históriques, urbanístiques o xenealóxiques, son les más avezaes.

Actes de plenos dende principios del sieglu XIX, o proyectos y llicencies municipales son los archivos que mayor volume xeneren. Y ente ellos, dalgunos de los documentos más relevantes de la hestoria local.

Ente les donaciones que curien, destaquen, por casu, llibros de l'antigua biblioteca del Monesteriu de Courias o un rexistru de la industria y el comerciu del conceyu de finales del XIX, dau pol Tous pa Tous.

Anque van siguir conviviendo les dos modalidaes, el futuru de los archivos municipales pasa pela dixitalización.

Curiar la hestoria y el patrimoniu documental del conceyu ye la misión fundamental del archivu, pero tamién lo ye ayudar na consulta y espardimientu, ensin la que caltener toa esta documentación nun tendría valir.