L'asesoramientu reproductivu pue facer medrar en miles d'euros los beneficios de los ganaderos

El confort y el bienestar ye fundamental pa llograr lleche d'alta calidá

L'asesoramientu reproductivu ye fundamental pa un ganaderu. Un veterinariu competente y interesáu por conocer la granxa que visita ye clave pa que la producción de lleche cumpla los oxetivos riquíos. A fin del añu, un bon asesoramientu supón miles d'euros de diferencia.

Según el númberu de cabeces de ganáu, el veterinariu visita les granxes con más o menos frecuencia. En 'El Fonduxu' hai 123 animales, ente ellos 55 vaques llecheres. David va cada 15 díes.

Desque la vaca pare, hai un periodu de reposu. 60 díes nos que nun ta en celu. Dempués insemínase por monta natural o inseminación artificial y a los 25 díes comprueba si ta preñada. A los dos meses yá podemos saber si ye machu o fema.

Nesta visita, David comprueba l'estáu de seis vaques en reposu pa pone-yos un tratamientu. Diagnostica la xestación de tres becerres y ocho vaques -siete d'elles tán en xestación-, y comprueba'l sexu de les críes d'Elfa, Magie y Pilarica: dos son machos de carne y una, fema de lleche. Datos positivos pal ganaderu.

El confort y el bienestar de les vaques ye fundamental pa llograr d'elles lleche d'alta calidá. Encamiéntase tener siete centímetros de bebederu d'agua llimpio y una cama de sable pa cada vaca.

Estos animales duermen ente 10 y 12 hores al día y, mientres duermen, producen la lleche que van dar. Esto evita que los caldares se contaminen y por tanto la lleche tamién. Les vaques producen más lleche nos meses centrales de la xestación y al mes siete ensúguense. Dexen de catales pa que puean preparales pal partu.

En tou esti procesu, lo más importante ye qu'esista'l ganaderu y detrás d'él un veterinariu que lu asesore.

Xuntos tienen que formar un tándem perfectu pa consiguir los oxetivos de producción.