L'ex-director xurídicu de Soxepsa, condergáu por intrusismu profesional

Por mor de la falta d'antecedentes penales, la pena de prisión quedó suspendida

El Xulgáu d'Instrucción númberu 3 d'Uviéu condergó güei al ex-director de los Servicios Xurídicos de Soxepsa a seis meses de prisión polos delitos d'instrusismu y falsedá documental tres exercer como abogáu 26 años ensin el títulu correspondiente y remanar el so espediente académicu pa que paeciera que superara toles asignatures.

La sentencia foi dictada de conformidá col Ministeriu Fiscal nel xuiciu rápidu celebráu güei escontra l'acusáu, que tendrá que pagar amás una multa de 10 meses a razón de nueve euros diarios pol delitu d'intrusismu (2.700 euros) y otra de seis meses a razón de nueve euros diarios pol de falsedá documental (1.620 euros).

Por mor de la falta d'antecedentes penales del condergáu, la pena de prisión quedó suspendida si nun vuelve a delinquir nel plazu de dos años, según informó'l Tribunal Cimeru de Xusticia.

Soxepsa contrató al condergáu'l 4 d'ochobre de 1990 pa emprestar servicios como abogáu na sociedá mesta onde llegó a ocupar el cargu de director de los servicios xurídicos pese a ser consciente de que nun yera llicenciáu en Derechu al nun llograr el títulu académicu correspondiente.

En payares de 2016 Soxepsa riquió-y qu'acreitara la so titulación y l'acusáu presentó una fotocopia compulsada ante notariu del so espediente académicu, que primeramente remanara col envís d'aparentar que superara toles asignatures pa llograr la llicenciatura.

El Ministeriu Públicu solicitaba primeramente una pena de nueve meses de prisión y multes de mayor cuantía que se vieron rebaxaes nuna tercer parte al aceptar los fechos l'acusáu.