L.lena va asumir los llabores de llimpieza del argayu de La Cortina

El Principáu va habilitar una partida tres valorar los trabayos a facer

El Conceyu de L.lena va asumir los llabores de llimpieza y saneamientu del argayu que'l pasáu martes esbarrumbó cuatro cases en La Cortina.

Ta na so circunscripción anque'l Principáu va habilitar una partida cuando se valoren los trabayos necesarios a facer por cuenta de les dimensiones de la obra.

Va salir a llicitación y yá pasaron pela zona delles empreses candidates a facelo. A güeyu, van tener que facer una pista pa llegar a la zona alta del tarreru onde entamó l'argayu y afitar el monte que, dicen, tien resquiebros na zona derecha.

Dempués van picar les piedres que cayeron, dalguna d'hasta 17 metros. Lo más difícil, aseguren, ye meter la maquinaria necesaria por mor del accesu yá que les cais del llugar d'El Valle d'El Güerna son mui estreches.

Pel momentu, nun hai riesgu pero hai una vivienda de fin de selmana desallugada. Nun se vio afectada pero ta asitiada mui cerca de la zona de seguridá.