La Fiscal Cimera d'Asturies abre dilixencies pola fola de quemes

Los autores de les quemes enfréntense a penes dende unu hasta 20 años de prisión

Los autores de quemes como les qu'estos díes tán afarando Asturies podríen enfrentase a penes que van dende unu hasta los venti años de prisión si hebo riesgu pa la integridá física de les persones, según recordó güei la Fiscalía Cimera d'Asturies, qu'abrió dilixencies d'investigación pola fola de fueos forestales.

La fiscal cimera d'Asturies, María Esther Fernández García, rexistró tola información disponible sobre les quemes forestales que dende la pasada nueche y la madrugada de güei tán actives nel Principáu, y que s'envaloren en más d'un centenar.

Amás dio treslláu a la Fiscal Delegada de Mediu Ambiente, María Esperanza González Avella, pa qu'incoe dilixencies d'investigación preprocesal penal coles mires d'esclariar les causes de los incendios y actuar escontra los posibles autores, nos supuestos nos que se trate de fueos intencionales.