La Fiscalía pide 11 años de cárcel pa Natalio Grueso

Acúsalu de delitos siguíos de malversación, societariu y otru d'insolvencia punible

La Fiscalía solicita una pena de 11 años de cárcel pal ex-director del Centru Niemeyer, Natalio Grueso, por presuntes irregularidaes feches na so etapa al mandu del equipamientu cultural d'Avilés.

El Ministeriu Públicu acúsalu nel so escritu de calificación provisional de los delitos siguíos de malversación, falsedá en documentu mercantil y otru societariu.

La Fiscalía, que yá unvió l'escritu al Xulgáu de Primer Instancia y Instrucción númberu 2 d'Avilés, tamién pide penes d'ente dieciocho meses y ocho años de prisión pa los otros cuatro acusaos.

Esti casu abrióse pa investigar supuestes irregularidaes na contabilidá de la primer etapa del Centru Cultural Oscar Niemeyer, col so ex-director xeneral Natalio Grueso, a la cabeza.

Na causa abierta por mor d'una denuncia presentada en 2012 pola entós conseyera de Cultura y presidenta del Patronatu Oscar Niemeyer, Ana González, tamién son investigaos l'ex-xefe de producción del centru Marc Martí, l'ex-secretariu José Luis Rebollo, la ex-muyer de Natalio Grueso, y un axente de viaxes.

La Fiscalía sostién que Natalio Grueso fizo "en tola so xestión" una serie de gastos, "unos ayenos dafechu al fin de la Fundación, por ser eminentemente de tipu personal d’ociu, y en cualquier casu, ayenos al oxetu de la mesma, y otros, de duldosa vinculación", que cargó al presupuestu de la Fundación.

Pa ello apautó con un trabayador de l'axencia de viaxes d’El Corte Inglés, J.M.V, pa facer factures "falses dafechu" y otres camudaes pa que nun se reflexaren nes cuentes añales o se reflexaren con conceptos ficticios.
Esti trabayador fai frente a ocho años de cárcel por un delitu d’estafa y otru de malversación en concursu medial con otru de falsedá.

El Ministeriu Públicu llama l’atención sobre’l fechu de que Grueso encargóse personalmente "de tola xestión de la naciente Fundación", al cuntar hasta entamos del 2012 "cola plena confianza" del Patronatu que, "en dexación d’unes correctes funciones de supervisión y control económicu, namái prestó atención a les de calter cultural".

La Fiscalía detalla nel so escritu un gran númberu de factures nes que desapaeció "la verdadera motivación que motiva’l cargu" o se taparon feches o clientes, munches d’elles de viaxes de personal ayenu a la Fundación, inxerta tamién la ex-muyer de Grueso, que fai frente a una pena de dos años y mediu de cárcel.

El Ministeriu considera que Grueso tamién s’ayudó del ex-secretariu, que fai frente a dos años y tres meses de cárcel por un delitu societariu, por tratar de presentar al Patronatu unes cuentes lo más depuraes posibles y "tapar el conceptu de los gastos reales".

La Fiscalía tamién pide 18 meses de prisión pal ex-xefe de producción, collaciu de Grueso, por malversación al recibir 9.000 euros d’una de les cuentes de la Fundación Niemeyer.

Namái nel exerciciu 2007, la Fiscalía identifica nel balance de situación unos gastos penriba de 142.000 euros col respaldu de factures "manipuliaes" en collaboración col ex-emplegáu de l’axencia de viaxes.

El Ministeriu Públicu confirma otros 152.600 euros "ensin correlatu nengún" en 2008 y alvierte de que n’años siguientes se siguieron contabilizando gastos ensin que "los soportes de factures" fueren reales "en munchos casos".

La Fundación sufrió un "tracamundiu contable" nel que se trató de tapar los gastos reales, y que llevó a la entidá a rexistrar en 2010 un déficit de 283.802 euros, anque la Fiscalía sospecha que yá sedría "mayor" por mor de que, per otru llau, dexaron de contabilizase factures bien emitíes.

Amás, llegó a axuntar una delda cola axencia de viaxes de más de 543.000 euros por mor de que se dexaron de contabilizar factures bien emitíes.

La Fundación acabó l’exerciciu 2011 con un patrimoniu netu negativu de 2,8 millones, lo que llevó finalmente al Patronatu a solicitar el concursu voluntariu d’acreedores, una situación que superó en 2013.

Namái en 2011, la Fundación recibió una subvención finalista del Principáu de 1,15 millones d’euros y otra de 235.000 euros del Ministeriu de Cultura.