La Fiscalía xube a 15 años la pena pal acusáu de matar a Carragal

Sostién que la participación n'engarradielles yera 'la forma avezada del procesáu de pasalo bien'

La Fiscalía xubió de 11 a 15 años de prisión el pidimientu de pena pal mozu acusáu de dar una "violenta" patada na cabeza al profesor pixuetu David Carragal que, según consideró, provocó-y una fractura cranial y mancadures cerebrales qu'acabaron na so muerte.

Nes conclusiones de la vista oral celebrada esta selmana na Sección Tercera de l'Audiencia Provincial, el Ministeriu Públicu sostuvo que la participación n'engarradielles yera "la forma avezada del procesáu de pasalo bien".

L'Audiencia celebró esti vienres la última sesión del xuiciu con xuráu que dende'l pasáu llunes resuelve la responsabilidá na muerte de Carragal de tres mozos, naquella fecha de 18 y 19 años: Jorge C.C. como presuntu autor material de la patada, y Ramón B. y Antonio S., por dos delitos d'omisión del deber de socorru al fuxir del llugar ensin ayudar a la víctima.