La Marcha del aluminiu llega al so fin en Madrid

Los trabayadores d’Alcoa reclamen garantíes pa los sos puestos de trabayu

Recta final de la Marcha del Aluminiu yá na comunidá de Madrid dempués d’entrar pel túnel de Guadarrama pa Villalba esta mañana.

A les 07:00, salíen dende San Rafael pa percorrer 27 kilómetros, nos que los ánimos tán "a tope", como afirmen los trabayadores.

Sicasí, siguen con duldes sobre si daveres va producise la merca de la factoría y reclamen garantíes pa los sos puestos de trabayu, y que’l Gobiernu y el Principáu nun los dexe a la so suerte.

Unes 100 o 150 persones, que nun tendríen trabayu efectivu dempués de la merca de la compañía, son el centru d’atención de los trabayadores, qu’insisten n’alcontra-yos una salida.

Amás del futuru d’estos trabayadores, esixen que se garanticen más años de trabayu. Namái con estes premises, apoyarán l’alcuerdu.

Con toes estes cuestiones embaxo’l brazu, piden una xunta col posible mercador, pa que-yos esplique los planes de futuru de la compañía, en casu de mercala.