Webcams
Buscar
La Policía llegó hasta la madre del ñácaru por una güella nuna bolsa de basura
Definen a Silvia Acebal como una persona mui fría y carente d'emociones
Una güella dactilar atopada nuna bolsa de basura foi la pista clave que llevó a la Policía hasta Silvia Acebal, la madre del ñácaru asesináu en Nuevu Roces. Desque apaeció'l calabre del pequeñu, la Policía procesó tola basura de la zona delles selmanes en busca de pruebes. Güei esplicáronlo nel xuiciu la investigación.
La güella de Silvia Acebal atopóse'l 20 d'agostu y nel mesmu tipu de bolsa de basura qu'usara nel crime pa desfacese d'unes tuayes ensangrentaes.
La Policía dio cola güella porque desque apaeció'l calabre del ñácaru procesó tola basura d'esi barriu. Una xera que calificaron de díficil y penosa. Foi la pista clave, yá que nin nel Sespa nin en nengún centru priváu esistía un historial cola xestación de l'acusada.
La Policía asegura que, una vegada detenida, Silvia Acebal reconoció que matara al so fíu; y que nun foi hasta que-y enseñaron la semeya del calabre del ñácaru cuando esbarrumbó y dixo qu'usó un cuchiellu de la cocina p'asesinalu.
Nel rexistru fechu na so casa, atoparon una mancha grande de sangre nel colchón y restos nel pasiellu.
La Policía reconoz que nun primer momentu tamién sospecharon del padre, pola so actitú, primeramente fría, qu'atribuyen a un shock, porque al amosa-y les semeyes del cadabre, esbarrumbó.
Los policíes que participaron, dalgunos con cerca de 40 años de serviciu, como'l xefe de la investigación, aseguren que nunca vieron un ensañamientu como'l d'esti crime; y definieron a Silvia Acebal como una persona mui fría y carente d'emociones.
