La capiella de San Antoniu de Padua, unu de los requexos más queríos de Cangues d'Onís

La guardesa de la capiella cuida les instalaciones y desplica la so historia a los turistes pel branu

Unu de los requexos más queríos de Cangues d'Onís, ye l’asitiáu en Cangues d’Arriba: El Campu San Antoniu. Nesti llugar, llevántase la capiella del santu que da nome al llugar y que ye’l patrón local: San Antoniu de Padua.

Toña Barrios ye la vecina qu’atiende la capiella, un llabor que fai de forma desinteresada y a la que, nunca nun lo pensare cuando la asumió, lleva dedicada los últimos 16 años.

La guardesa abre la rexa de la capiella un mínimu de tres o cuatro vegaes al día. Ente los sos llabores, tán regar les flores del altar, llimpiar la capiella o vixilar el cepillu.

Nacida en Zamora, Toña lleva yá más de media vida en Cangues d'Onís. Vecina d'El Campu San Antoniu, vive mui cerca de la capilella qu’atiende, un llabor que considera un honor y un arguyu.

Con fama de milagreru, la devoción de los cangueses por San Antoniu, talla que posiblemente seya del sieglu XVI y al que cariñosamente llamen 'San Antoniu, el nuestru', ye mui fuerte. Asina ye que munchos vecinos s’averen caldía hasta la so capiella pa reza-y, da-y les gracies o face-y dalgún pidimientu.

Ente ellos la propia guardesa, que por supuestu tien gran fervor a un santu col que comparte hasta’l nome.

Nin que dicir tien que, pa Toña, les ocupaciones na capiella de San Antoniu van a más cuando llega xunu, entama la novena y ta cerca’l día grande del patrón, el 13 de xunu.

Desplicar la hestoria d’esta capiella na que San Antoniu comparte altar cola Virxe del Carme y Santa Ana a los turistes que s’averen a visitala, sobre manera pel branu, ye otra de les xeres de la canguesa que cuida del santu patrón.