La defensa de Jorge Cue asegura que l'autopsia confirma la versión de los acusaos

Señala que los xuicios paralelos solo contribuyen a aumentar el dolor

L'home que morrió’l pasáu llunes tres sufrir una agresión nes fiestes del barriu uvieín de La Florida, David Carragal, de 33 años, sufrió dos golpes, unu d'ellos compatible con una cayida al suelu tres recibir una patada, según determinó l'informe preliminar del forense.

L'abogáu de los tres mozos deteníos por estos fechos, unu d’ellos ingresó'l miércoles en prisión provisional tres reconocer que dio una patada a la víctima, sorrayó esti vienres que los fechos rellataos polos sos defendíos "axústase a lo socedío" como "confirma" l'informe forense.

"Hai un únicu golpe y lo demás foi consecuencia de la cayida al suelu, nun hebo golpes posteriores", sorrayó'l lletráu Gabriel Cueto en declaraciones a los periodistes.

L'abogáu lleó un comunicáu nel que los tres mozos y les sos families espresen les sos condolencies pol fallecimientu de Carragal y nel qu'aseguren que tán fondamente afectaos polo asocedío.

Gabriel Cueto sorrayó que los mozos dexaron claro'l so arrepentimientu "dende'l primer momentu, cuando se personaron voluntariamente en comisaria pa dar cuenta a les autoridaes xudiciales".

El lletráu señaló que "los xuiciu paralelos y dellos mensaxes en redes sociales nun contribuyen más qu'a afondar nel dolor qu'arrodia a esti tráxicu sucesu", y recordó que "el procedimientu xudicial sigue y hai que dexar trabayar a la xusticia"