La delegada del Gobiernu reconoz l'informe concluyente del casu Sheila Barrero

La Fiscalía va valorar si acusa al ex-noviu tres la instrucción

El xulgáu de Cangas tien nueves pruebes sobre l'asesinatu de Sheila Barrero qu'apunten al so ex-noviu como presuntu autor del crime.

Les amueses recoyíes nel so día pola Guardia Civil volvieron ser analizaes coles tecnoloxíes disponibles anguaño. Señalen que l'acusáu tuvo nel coche de la moza, enantes del so asesinatu, polos restos de fibres d'un abrigu, y que disparó a Sheila, por nuevos datos del análisis químicu fechu fai 15 años a la mano del presuntu autor y a la so ropa.

Un análisis refuga que los restos de disparos fueren por tar de caza, como dixo nel so día, y que lu rellacionen ensin dulda col arma del crime.

La delegada del Gobiernu, Delia Losa, afirmó que "l'informe ye mui concluyente".

Borja Vidal declaró en 2007 como imputáu pero nunca lu acusaron formalmente. La delegada del Gobiernu pide a la Fiscalía que dea'l siguiente pasu, "esperemos que la Fiscalía se faiga cargu del informe, lu valore y decida o non siguir el procesu".

Pela so parte, la Fiscalía señaló que'l casu ta n'instrucción, ye dicir n'investigación, y que nun va ser hasta que termine esta fase cuando se faiga una valoración y se decida si s'acusa o non.

Mentanto, la familia de Sheila Barrero nunca perdió la esperanza de ver el crime resueltu y más desque se conoció que'l casu fuera reabiertu. Agora confíen en que la Fiscalía dea un pasu alantre y el presuntu culpable seya por fin xulgáu.