La epidemia de gripe nótase nos centros médicos

Los médicos tienen mieu d'una saturación ante la falta de facultativos nes fiestes

La epidemia de gripe dexa yá esperes nos centros d'atención primaria y obliga a habilitar espacios adicionales nos hospitales.

L'Hospital de Cabueñes tuvo qu'abrir una planta cerrada dende'l branu p'atender la demanda de cames.

La situación, de momentu, ye más tranquila nel HUCA -con toles sos plantes abiertes-, nel Hospital San Agustín d'Avilés y nos hospitales de les cuenques.

Una saturación que se da sobre manera nestes feches ante los pocos especialistes de medicina de familia y pediatres pa cubrir les baxes y permisos nes navidaes, cuando se prevé la mayor incidencia de los cuadros gripales.

Los facultativos denuncien que namás se sustitúi una de cada 10 ausencies.

Lo que yá ye una realidá son les esperes nos centros de salú, en especial, nes zones urbanes. Nesti periodu habrá hasta cuatro facultativos menos nesos ambulatorios. La Sociedá Asturiana de Medicina Comunitaria y de Familia prevé demores, y más coles visites domiciliaries.

Según los datos que remana USIPA, por exemplu, nel Centru de Salú de Puerta la Villa de Xixón rexistróse'l sábadu más de cinco hores d'espera.

Médicos de familia, pediatres, anestesistes y radiólogos son les especialidaes cotizaes. Pa evitar que los pocos qu'hai colen a otres comunidaes con meyor remuneración, el Sespa renovará contratos per un añu a partir del 1 de xineru.

Mientres, pa esquivar el gripe, los grupos de riesgu entá tán a tiempu de vacunase. Pa toos ye mui conveniente llavar les manes y si entá asina se garra'l gripe y se trabaya de cara al públicu, hai que coyer la baxa que darán automáticamente.