La falta de ñeve obliga a retrasar l’apertura de Valgrande-Payares

La estación espera que la situación meyore los díes vinientes y puea abrise "lo enantes posible"

La lluvia que cayó nes últimes hores impidió l’apertura parcial de la estación ivernal de Valgrande-Payares prevista pa esti sábadu.

La estación d’esquí, avanzó na so páxina web, que la falta de ñeve motivó’l retrasu nel entamu de la temporada al empar qu’espera que la situación meyore los díes vinientes y puea abrise "lo enantes posible".

La Dirección Xeneral de Deporte dio anuncia de qu’ayeri la estación ivernal de Valgrande-Payares abriría güei parcialmente, un día dempués del entamu oficial de la temporada d’esquí, por mor de la bona evolución de los trabayos que se lleven alantre nes instalaciones y la idoneidá de les condiciones climatolóxiques.

Según aseguró nun comunicáu, siguen al ritmu estipuláu los trabayos nel equipamientu de L.lena col envís de que puea abrise dafechu en feches vinientes.

La que sí abrió güei ye la estación de Fontes d’Iviernu. Con daqué más de 8 kilómetros esquiables y 14 de les sos 15 pistes abiertes, Fontes vivió güei’l segundu día d’apertura de la temporada.