La figura del veterinariu pasará a ser obligatoria nes esplotaciones ganaderes

Los titulares de les esplotaciones tendrán que roblar un contratu colos veterinarios de polo menos un añu

Nel casu de les ganaderíes de vacunu, los veterinarios tendrán que tar presentes en toles que tengan más de cinco vaques o 30 xatos d’engorde. Los titulares de les esplotaciones tendrán que roblar un contratu con ellos que dure polo menos un añu y cumplir col plan sanitariu total que faen, asina lo esplica David Iglesias.

La periodicidá de les visites zoosanitaries tendrá que ser, polo menos, añal y el veterinariu redactará un informe con aspectos a meyorar, por exemplu, en materia de bienestar animal.

David pon en valir la profesionalidá de los ganaderos asturianos. Por eso cree que les esixencies tienen que ser razonables y que’l veterinariu d’esplotación sedrá determinante p’ayudalos a meyorar.

Anque siempres hubo veterinarios trabayando de la mano de los ganaderos, agora esta figura pasa a ser obligatoria. Daqué qu’en munches esplotaciones entá desconocen. Poro, reconoz David, lo que toca agora ye percorreles p’ayudalos a cumplir cola nueva llei.