La fola d'incendios n'Asturies, ente los eventos climáticos estremos de 2023, según Greenpeace

Esti añu tamién ye'l más calurosu dende que se tienen rexistros

Esti 2023 ye l’añu nel que se rexistraron más eventos meteorolóxicos estremos según Greenpeace. La organización ecoloxista tamién afita que se batirá un nuevu récor d’emisiones de CO2 a l’atmósfera, responsables directes de los fenómenos estremos.

N’España hubo 30 d’estos eventos fuera de lo normal, ún d’ellos n’Asturies. Fueron los incendios qu’arrasaron 32.000 hectárees, sobre manera nos conceyos de Valdés y Tinéu, ente finales de marzu y entamos d’abril. 278 fueos empeoraos poles altes temperatures y la seca, qu’obligaron a pidir la declaración de zona catastrófica.

Esti añu tamién ye’l más calurosu dende que se tienen rexistros

España sufrió cinco foles de calor esti branu con una máxima rozando los 47ºC nel aeropuertu de Valencia.

En 38 díes esti añu, superamos los rexistros máximos de temperatura, ente ellos tres díes esti mesmu mes d’avientu en Málaga con cuasi 30 graos. Un terciu de los océanos sufre una fola de calor marina multiplicando les tormentes y ciclones.

Ún d’esos casos ye’l mar Mediterraneu, que dende abril y entá güei supera la temperatura media del agua. En branu tuvo ente tres y cuatro graos penriba de lo normal.

Tormentes, furacanes, ciclones y inundaciones son otros d’esos fenómenos. N’España, por exemplu, la DANA, qu’afectó a Madrid y a Castiella-La Mancha en setiembre dexó cinco persones muertes, tres desapaecíes y abondos estrozos materiales.

Toos estos eventos etremos tienen consecuencies. De mano na salú. Según el sistema de vixilancia de mortalidá diaria del Institutu Carlos Terceru, rexistráronse 2.100 muertes n’España pola temperatura escesiva. Tamién hai un costu económicu, 2.900 millones d’euros n’España, según el barómetru de Catástrofes.