La instructora del 'casu Mareína' cree que too tendría que vese nun xuiciu

La Fiscalía señala que la instrucción del casu yá acabó y nun caben nueves dilixencies

La instructora del 'casu Mareína', nel que s’investiga'l presuntu fraude de cerca de cuatro millones d'euros na entrega de material escolar a más de 80 colexos, coincide cola Fiscalía en que los fechos qu'agora tán sobre la mesa podíen beneficiase d'un solu xuiciu y d'una única pena.

Entienden que ye un delitu de siguío y por ello consideren que, nel casu de qu'Iglesias Riopedre, María Jesús Otero y los empresarios d'Igrafo y Almacenes Pumarín, seyan condenaos otra vuelta, habría que desconta-yos la cuantía de la pena de cárcel yá impuesta na sentencia anterior. Caún foi entós condenáu a más de cinco años de prisión.

Nun se produz, eso si, recalca nos sos autos la maxistrada, l'efectu de cosa xulgada porque nesti procedimientu analízase'l supuestu fraude nel suministru de material a más de 80 centros frente a los cinco que s'analizaron nel 'casu Marea'.

Riopedre, Otero y los empresarios tán agora pendientes de que l'Audiencia Provincial resuelva sobre los recursos que presentadron escontra l'autu de procesamientu. Nél, la xueza, señalaba qu'había señales abondes p'acusalos d'un delitu de siguió de prevaricación, falsedá documental, malversación y sobornu.

Esta selmana cúmplense 12 años dende qu'estallare la investigación sobre les irregularidaes na alministración qu'acabó col prindamientu de Renedo, Otero, Riopedre y los empresarios.

La Fiscalía señala que la instrucción del 'casu Mareína’ yá acabó y nun caben nueves dilixencies

Les defenses de los empresarios procesaos pol Casu Mareína reclamen que s’inxerte a la causa tolos archivos informáticos que l'Axencia Tributaria sacó del rexistru fechu n'Igrafo y Almacenes Pumarín va 12 años.

Creen que ye fundamental pa exercer el so derechu a la defensa, al tar yá les empreses liquidaes y nun tener accesu a esa documentación. Un pidimientu que refuga la Fiscalía.

El Ministeriu Públicu considera que nun se puen practicar nueves dilixencies porque'l plazu d'instrucción del 'casu Mareína’​ yá acabó. Foi va unos díes, el 19 de xineru, ensin que s'acordare, señala, una nueva prórroga. Nun caben, poro, a xuiciu de so, nueves pruebes.