La madre acusada d'apuñalar al so ñácaru en Xixón va sentase nel banquín a partir d'esti llunes

El Ministeriu Fiscal pide pena de prisión permanente revisable

La muyer acusada de matar de 53 puñalaes al so ñácaru recién nacíu y tirar el so calabre dientro d'una mochila a un contenedor nel barriu de Nuevu Roces de Xixón en 2019 va ser xulgada a partir d'esti llunes por un tribunal con xuráu por un delitu d'asesinatu colos agravantes d'enfotu y parentescu, pol que la Fiscalía pide la pena de prisión permanente revisable.

El xuiciu escontra Silvia A.M., que tenía 27 años nel momentu de los fechos, va facese a lo llargo de cinco sesiones na Sección Octava de l'Audiencia Provincial, con sede en Xixón.

El padre biolóxicu del ñácaru, Daniel B.S., de la so mesma edá, personóse na causa como acusación particular, yá que desconocía que la so entós novia taba embaranzada.

Los fechos socedieron el 1 d'agostu de 2019, cuando l'acusada, que taba sola na so casa, dio a lluz al ñácaru.

Según el relatu de la Fiscalía, esi mesmu día la muyer pensó acabar cola so vida y enantes de les 19:00, hora a la que'l so compañeru sentimental tornaba del trabayu, coyó un cuchiellu de cocina y pegó-y al ñácaru 53 puñalaes en distintes partes del cuerpu que-y provocaron la muerte.

Dempués de matalu, l'acusada, según el Ministeriu Fiscal, metió al ñácaru, xuníu pol so gordón umbilical a la placenta, nuna mochila que tiró a un contenedor de basura asitiáu enfrente de la so casa.

El ñácaru foi atopáu por un ciudadanu sobre les 2:30 del 2 d'agostu, dientro del contenedor allugáu na cai Jenaro Suárez Pérez.

La Fiscalía sostién que l'acusada guardara l'embaranzu a la so pareya sentimental d'entós, cola que convivía, y a toles sos amistaes y familiares, polo que naide conocía'l so estáu.

L'acusada esplicó al so noviu que los restos de sangre qu'había per distintos cuartos de la casa debíense a que sufriera un sangráu masivu por un duviesu nun ovariu y esta versión caltúvola primeramente per teléfonu y más tarde cuando ésti tornó a casa acabada la so xornada llaboral.

La esploración xinecolóxica, a la que se sometió l'acusada nel Hospital Universitariu Central d'Asturies (HUCA), refugó dafechu la so versión y foi detenida'l 23 de setiembre de 2019.

La Fiscalía sostién que l'acusada nun carez alteración dalguna de les sos facultaes, polo que nel so escritu de calificación provisional caltién que cometió un delitu d'asesinatu con enfotu al ser la víctima especialmente vulnerable por razón de la so edá y aplica l'agravante de parentescu.

El Ministeriu Fiscal pide que se condergue a l'acusada a la pena de prisión permanente revisable y al pagu d'una indemnización de 50.000 euros al padre del ñácaru.