La plantiya d’Alcoa Avilés marcha a pie pa Uviéu

Más de 30 kilómetros pa reclamar una solución qu’evite’l pieslle de la fábrica

Unos 200 trabayadores de la factoría qu’Alcoa tien n’Avilés percorrieron güei a pie, baxo la lluvia y temperatures ivernales, los 30 kilómetros que separten la instalación industrial d’Uviéu pa protestar escontra l’anunciáu pieslle de la planta y pidir soluciones.

Vistíos con camisetes marielles col lema "Alcoa nun se pieslla", los trabayadores d’Alcoa y empreses auxiliares xunto a dalgunos familiares, llevaron la so protesta per tolos pueblos qu’atraviesa la carretera vieya ente Avilés y la capital asturiana, en munchos d’ellos fueron recibíos con aplausos y muestres de sofitu.

La marcha de la plantiya de l’aluminera saliere poco dempués de les ocho de la mañana de Samalandrán y llegó ocho hores dempués, baxo una fuerte lluvia -xarazu dalguna vegada-, a la plaza d’España, onde ta la Delegación del Gobiernu d’Asturies.

Dempués d’una pancarta na que se podía lleer "Non al desmantelamientu de la industria. Pol trabayu n’Asturies", los trabayadores d’Alcoa fueron recibíos por familiares y políticos al glayíu de "Alcoa nun se pieslla", que se convirtió nel lema de toles protestes que llevaron alantre.

Ellí taba tamién la delegada del Gobiernu n’Asturies, Delia Losa, cola qu’aconceyaron dellos miembros del comité d’empresa, ente ellos, el so presidente, Sergio Sobrido, qu’amosó la so alegría pola alta participación que despertó esta "marcha mariella".

De mano apuntáronse unos 160 trabayadores pa participar na mesma, pero güei superáronse les espectativea y ficieron el percorríu más de 200, según Sobrido, qu’amosó la so esperanza de que la multinacional norteamericana dea finalmente marcha atrás na so decisión de dexar de producir nes plantes d’Asturies y A Coruña.

Esta marcha a pie produzse nun puntu crucial del conflictu porque los sindicatos punxeron de plazu hasta’l llunes viniente pa qu’Alcoa retire l’espediente d’estinción de trabayu por entender que ta incumpliendo "claramente" la normativa europea, porque’l procesu de consultes y d’información tendría que ser enantes de la toma d’una decisión.