La popular Emma Ramos dexa'l so escañu na Xunta Xeneral

El so puesto ocuparálu Gloria García

La diputada popular na Xunta Xeneral del Principáu Emma Ramos (Avilés, 1976) renunció, por motivos personales, al escañu qu'ocupaba dende l'añu 2012 nel parllamentu rexonal, informaron fontes de la formación.

La renuncia de la portavoz del PP n'asuntos económicos foi comunicada yá a la Mesa de la Xunta Xeneral del Principáu y el so puestu sedrá ocupáu por Gloria García.

Llicenciada en Ciencies Económiques pola Universidá d'Uviéu, Ramos ye funcionaria de carrera del Cuerpu Superior d'Alministradores del Principáu d'Asturies, puesto del que ta n'escedencia dende qu'entamó la so xera política de la mano de la presidenta del PP d'anguaño, Mercedes Fernández.

Ramos ocupó'l númberu tres de la llista popular qu'encabezaba Mercedes Fernández nes elecciones autonómiques de 2011, puestu que volvió a repitir nos comicios del añu 2015.

Esta avilesina asentada n'Uviéu trabayare enantes d'incorporase a les llistes del PP como interventora xeneral de l'alministración asturiana na etapa de Gobiernu de Foro, con Francisco Álvarez Cascos como presidente.

Ramos también trabayó como auditora na Sindicatura de Cuentes, como xefa de la Sección de Personal de la Dirección Xeneral de la Función Pública y como coordinadora d'Evaluación na Dirección Xeneral de Planificación y Evaluación de Recursos Humanos, ente otros puestos.

Nel últimu congresu rexonal de los populares asturianos, la presidenta del PP, Mercedes Fernández, cuntó tamién con ella pa ocupar la Vicesecretaría de Política Autonómica.