La producción agraria asegurada crez un 80% nos últimos años

El pasáu añu les mayores indemnizaciones fueron pal quivi

Unos invernaderos volaron el pasáu iviernu polo que'l llabrador Aquilino Fernández define como un furacán. Gracies a la so póliza de seguros, pudo cobrar una indemnización tanto pola collecha como polos daños materiales. Diz qu'anguaño yá nun hai estaciones y hai que tar preparáu.

N'Asturies, nos postreros cinco años, creció cuasi un 80% la producción agraria asegurada. Según la xestora d'estos seguros, Agroseguro, asegurar o non ye una decisión empresarial que compensa cuando la inversión en riesgu ye alta. Les pólices abarátense gracies a que tán subvencionaes hasta un 50% pola alministración. Asina lo asegura José Bernardo, delegáu nel noroeste d'Agroseguro.

Cuasi'l 90% de la producción asegurada n'Asturies son los cultivos forraxeros. Son maíz destináu a piensu, mui sensible a les seques. Tamién s'aseguren les hortolices y los frutos que necesiten invernaderu, los quivis y les pumares. El pasáu añu les mayores indemnizaciones fueron pal quivi.