La regasificadora d'El Musel conectaráse a la rede y podrá tener más usos

Enrique Fernández: "Queremos qu'entre en marcha cola máxima funcionalidá posible"

La regasificadora d’El Musel nun podrá funcionar como una islla y sí que tará conectada col restu de la rede gasista una vegada qu’en xineru entame a tar operativa como almacén loxísticu, según el conseyeru d’Industria, Trabayu y Promoción Económica, Enrique Fernández, que considera que tamién podría dar sofitu al sistema en casu de fallos o accidentes n’otres plantes.

"Queremos qu’entre en marcha cola máxima funcionalidá posible, pero nun pue entrar nel sistema ufiertando servicios que nun son necesarios", afirmó’l titular d’Industria al responder nel plenu celebráu esti martes nel parllamentu autonómicu a una entruga del portavoz de Foro, Adrián Pumares.

Según Fernández, inxertar la regasificadora d’El Musel nel sistema cuando tán cubiertes toles necesidaes por otres plantes namás supondría una medría de los costos y, poro, de la factura que llega a los ciudadanos.