La ufierta d'empléu públicu d'Asturies de 2023 va cubrir 1.924 vacantes con personal fixo

El Gobiernu busca avanzar na sienda de la estabilización

El Conseyu de Gobiernu del Principáu aprobó güei la ufierta d'empléu públicu de 2023, qu'inclúi 1.924 places que, en tolos casos, correspuéndense con vacantes de manera que nun se creen nuevos puestos sinón que convoquen aquellos yá esistentes que ye necesario cubrir con personal fixo al traviés de los correspondientes procesos de selección.

L'oxetivu ye, según el Gobiernu, garantizar la continuidá de los servicios públicos y avanzar na sienda de la estabilización por aciu del amenorgamientu de la temporalidá de la plantiya.

La distribución de la OPE acuta 732 places nel ámbitu del Serviciu de Salú, con especial incidencia nel personal médico y d'enfermería; 87 nos cuerpos de funcionarios docentes y 877 pa personal funcionario y llaboral, ente'l que ta personal de centros d'asistencia directa al ciudadanu como enfermería, auxiliares d'enfermería y auxiliares educadores de centros del organismu autónomu ERA y de la Conseyería de Derechos Sociales y Bienestar, y places de bombera pal Serviciu d'Emerxencies (Sepa).

La relación complétase con 48 puestos pa la estabilización pol procedimientu de concursu y 180 de promoción interna pa delliniantes y guardes del mediu natural al empar que se dexen cinco places a la Universidá d'Uviéu y otres cuatro al Consorciu d'Agua d'Asturies (Cadasa) pa que les incluyan nes sos respectives ufiertes d'empléu públicu.