La vecina de Froseira Otilia ye la postrer molinera n'activo de Bual

Los turistes visiten el so molín, al qu'inda con 87 años va a diario

A los sos 87 años, Otilia ye unu d'esos exemplos de vida que munchos quixeren pa sí mesmos. Ye la única vecina de Froseira y la postrer molinera n'activo nel conceyu de Bual.

Tres emigrar unos años a Caracas, llegó equí fai más de mediu sieglu p'asitiase col so home. Ye raru'l día en que nun visita'l so molín, el que-y dio de comer munchos años. Va décades necesitábase granu pa facer pan.

Otilia quedó vilba fai 19 años, pero decidió quedar en Froseira a vivir sola. Apocayá fizo un pequenu altar cerca del molín pa rezar. Failo delles vegaes, anque nun ye abondo relixosa.

Son munchos los turistes que lleguen equí pola cercanía con a Cova do Demo. Son los momentos, asegura, más entreteníos del día.

A esta molinera l'aire fresco, l'alimentación de tola vida y el bon humor diéron-y una salú prácticamente de fierro. Pasar con ella unos minutos ye a cencielles toa una bendición. Pidímos-y la receta pa llegar asina de bien a cuasi los 90 años, pero paez que nun hai nenguna.

En Froseira el tiempu lleva años deteníu, nun hai dulda. Les aguyes del reló contrólales con soltura Otilia, una d'eses persones enllenes de sabiduría qu'inda tien enforma que cuntar.