La vilba d'Ardines afirma que Pedro Nieva conocía los vezos del conceyal

La familia de Javier Ardines toma'l protagonismu nel xuiciu n'Uviéu

La vilba del conceyal d'IX de Llanes Javier Ardines sorrayó esti vienres que'l presuntu inductor del so asesinatu, Pedro N.A., sospechaba de la infidelidá de la so esposa col conceyal y que l'acusáu conocía los vezos de la víctima, los d'un home de costumes repitíes que salía a faenar tolos díes al alborecer.

Na séptima sesión del xuiciu con xuráu popular que se celebra na Audiencia d'Uviéu, la vilba d'Ardines afirmó que'l so home y ella calteníen una bona rellación d'amistá con Pedro N.A. y la so muyer, de la que ye prima segunda, y salíen xuntos tolos fines de selmana qu'éstos diben a Belmonte de Pría, onde les sos viviendes tán mui cercanes.

Primeramente al entamu de la declaración de la vilba, el maxistráu presidente del tribunal del xuráu alvirtió a los lletraos que la llei ampara a la familia d'Ardines pa que nun se-yos formulara pregunta dalguna relativa a la intimidá que nun tuviera rellación col casu.

Tanto la vilba como los sos dos fíos llegaron a la sala en meta d'una gran espectación mediática y nel so interrogatoriu'l presuntu inductor Pedro N.A. evitó en tou momentu cruciar la mirada con ellos.