La xueza decreta l'apertura de xuiciu oral escontra Villa y Castillejo

Acúsalos d'un delitu siguíu d'apropiación indebida

La xueza decretó apertura de xuiciu oral por un presuntu delitu siguíu d'apropiación indebida escontra l'ex-secretariu xeneral del SOMA-UXT José Ángel Fernández Villa y l'ex-secretariu de la Fundación pa la Formación, la Investigación, la Documentación y los Estudios Sociales (INFIDE) Pedro Castillejo.

La titular del Xulgáu d'Instrucción númberu 2 d'Uviéu dictó un autu, nel qu'impón a Fernández Villa una fianza de 434.158 euros y a Castillejo otra de 119.434 euros, polos importes presuntamente apropiaos.

La xueza, qu'ordena l'apertura de xuiciu oral tres acabar apocayá la instrucción entamada a partir de la querella por apropiación indebida presentada pol sindicatu, alvierte que, en casu de nun depositar la fianza, fadráse l'embargu de bienes "en cantidá abonda p'asegurar la suma señalada".

Amás de les correspondientes indemnizaciones, la Fiscalía piede nesti casu cinco años de cárcel pa Fernández Villa y tres y mediu pa Castillejo, unes penes que l'acusación particular del sindicatu, representada pol despachu Ontier, eleva a seis y cinco años de prisión, respectivamente.

Según el fiscal, el que fuera líder del sindicatu mineru más de 35 años, exercía una "posición de dominiu dafechu" na organización y yera quien tomaba toles decisiones, incluyida la de crear l'INFIDE y poner a Castillejo al frente d'esi organismu.

El Ministeriu Públicu espón nel so escritu d'acusación que Fernández Villa, "aprovechando la so posición de control dafechu de la entidá, camentó un plan empobináu a desviar los fondos del sindicatu al so patrimoniu personal" qu'ente 1989 y 2010 dio-y 434.158 euros.

Asina, ente los años 1989 y 2001 cobrara los cheques nominales colos qu'Hunosa pagaba al sindicatu les dietes por asistencia de sindicalistes al comité intercentros y que sumaben cerca los 244.000 euros.

Según la Fiscalía, tres decidir en 2001 la empresa estatal minera facer esos pagos per transferencia bancaria, Fernández Villa alcordó que los ingresos nun se ficieren na cuenta del SOMA-FITAG-UXT, sinón n'otra de nome asemeyáu (SOMA) "na que tenía un control dafechu" y qu'usó como una cuenta personal.

La Fiscalía asegura amás que l'ex-líder mineru "utilizó'l patrimoniu del SOMA como una cuenta personal de gastos" na que, amás de los xustificaos pola so xera de secretariu xeneral, amestó otros meramente personales.

Asina, amás de que-y pagaren dietes por kilometraxe y comíes, cobró gastos incompatibles de carburante, multes, factures de caltenimientu de coches, seguros, resguardos d'aparcamiento o periódicos, ente otros.

L'acusáu tamién fizo munches compres "ensin xustificación dalguna" con cargu a les tarxetes de creitu del sindicatu, coles que pagó puros, sombreros, perfume, flores, centros dietéticos, maletes, productos de farmacia y parafarmacia, llibros, discos o conocíos y munchos restauranes.

En total, según conseña la Fiscalía, pagó coles tarxetes ente 2001 y 2012 más de 73.000 euros de gastos personales y sacó cerca de 13.800 euros en metálico pal so disfrute personal

El fiscal considera tamién que pa mercar en 2001 un Mitsubishi Montero usó otros 33.520 euros y que cinco años depués volvió a cargar al sindicatu otros 52.100 euros pa pagar, ente otros gastos, otru vehículu pal so usu particular.

"Esti vehículu foi usáu y disfrutáu namás pol acusáu tamién tres el so cese como secretariu xeneral", caltién l'escritu d'acusación nel que s'alvierte que Fernández Villa tenía nel sindicatu pal so usu un Audi A4 pol que se pagaron 16.700 euros de más que tamién fueron a parar a la so cuenta.

En cuanto a Castillejo, el fiscal considera que "aprovechando la so posición de control dafechu de la entidá" fizo una serie d'operaciones ensin rellación cola xera de la fundación, como reintegros n'efectivo, pagos en "milenta" restauranes, farmacies, tiendes o compañíes aérees, y que ascendieron entre los años 2004 y 2013 a 119.434 euros.

Al marxe d'esti casu, Fernández Villa tamién ta siendo investigáu pola Fiscalía Anticorrupción pol orixe de los 1,4 millones d'euros que regularizó tres la última amnistía fiscal.