La xueza refuga les dilixencies solicitaes pola defensa de Villa

"Nun tienen utilidá o trescendencia dalguna pa la instrucción"

La titular del Xulgáu d'Instrucción númberu 2 d'Uviéu refugó la totalidá de les dilixencies solicitaes pola defensa del ex-secretariu xeneral del SOMA-UGT José Ángel Fernández Villa na causa abierta pola querella por apropiación indebida presentada pol sindicatu.

Nun autu, la maxistrada determina que les dilixencies probatories interesaes pola defensa "nun tienen utilidá o trescendencia dalguna pa la instrucción".

Ente eses dilixencies refugaes alcuéntrase'l pidimientu a Hunosa de toles actes de los comités intercentros ente los años 2001 y 2003, onde Villa ta acusáu d'apropiase de les dietes destinaes a los representantes sindicales, o la solicitú a Liberbank de la totalidá de les factures de les compres feches coles tarxetes na contornada del ex-líder sindical.

La maxistrada refúgales "partiendo de que'l xuez instructor refugó la práctica de pruebes o dilixencies d'investigación que seyan impertinentes, inútiles, dilatories o ensin importancia pa lo que ye la fase d'instrucción, porque l'instructor nun ta obligáu a practicar toles que les partes propongan porque pue refugar les que considere inútiles o perxudiciales".

La práctica d'estes dilixencies foi solicitada pola defensa de Fernández Villa, dempués de qu'esti declarare'l 3 de marzu pasáu como investigáu énte la maxistrada.

Fernández Villa, refugó énte la xueza llevar dineru de la organización, declaró énte'l Xulgáu dempués que'l SOMA-UGT presentare en setiembre de 2015 una querella escontra l'ex-líder sindical reclamándo-y la devolución de 360.000 euros, ampliaos dempués hasta 420.000, en conceptu de gastos ensin xustificar asina como pola apropiación de dietes d'asistencia destinaes a los miembros del sindicatu pa dir a xuntes del comité intercentros d'Hunosa.