La xusticia anula la decisión del Conceyu d'Uviéu sobre'l Bulevar de Santuyano

El PSOE diz que los contratos del Bulevar siguen vixentes

El Xulgáu de lo Contencioso Alministrativo númberu 3 d'Uviéu declaró nulu l'alcuerdu algamáu en xunetu de 2021 pola Xunta de Gobiernu del Conceyu d'Uviéu pal resolvimientu del contratu de redacción del proyectu d'execución de la obra del espaciu del Bulevar de Santuyano, pola imposibilidá d'executar la prestación de los términos apautaos.

La sentencia, dictada'l pasáu 7 de payares, señala la nulidá del actu, énte la impugnación del mesmu presentada pol Grupu Municipal Socialista nel Conceyu d'Uviéu, y impón al Consistoriu una costa de 1.000 euros.

Amás, el xuez afita como cuantía d'esti recursu la cantidá de 300.016,16 euros, que foi'l dineru que s'alcordó cola UTE d'empreses Bosque y Valle pa la lliquidación del citáu contratu, y afita que pue presentase un recursu d'apellación nel plazu de quince díes.

En rueda de prensa, los conceyales socialistes Wenceslao López y Ricardo Fernández indicaron que la sentencia da-yos la razón énte la decisión del equipu de gobiernu de resolver el contratu pola supuesta imposibilidá d'executalu al entender que los pliegos y demás documentos contractuales incurríen n'importantes faltes "cuando tendríen que declaralu nulu".