Lastra pide "respetu" al PP al venceyar al Principáu col "casu Enredadera"

L’Ayuntamientu de Xixón defende la inocencia del xefe de la Policía Local

El Principáu defende la llegalidá de los procesos de contratación públicos dempués de que’l PP punxere en sospecha dos contratos roblaos pola Conseyería de Servicios con empreses involucraes na operación Enredadera.

El conseyeru d’Infraestructures, Ordenación del Territoriu y Mediu Ambiente, Fernando Lastra, salió na so defensa y pidió al PP "rigor, prudencia y respetu".

La delegada del Gobiernu n’Asturies, Delia Losa, tamién pidió que nun se demonice’l sistema de contratación de les alministraciones.

En Xixón, l’Ayuntamientu defendió la inocencia del xefe de la policía local, qu’aparez nel sumariu del casu en conversaciones telefóniques.

Empresarios de la presunta trama de corrupción comenten ente ellos que’l so departamentu pue ser un filón pol volume de contratos públicos que quieren sacar a llicitación.

El propiu Alejandro Martínez Gallo fala con ellos pa quedar pa cenar. El conceyal de Seguridá Ciudadana, Esteban Aparicio, quíta-y importancia a les conversaciones y asegura que les empreses de la presunta trama corrupta nun algamaron contratos cola policía local.

Aparicio aclaró que los tribunales nun necesitaron nengún documentu al Ayuntamientu de Xixón sobre’l casu Enredadera.

Güei’l consistoriu facilitó unu de los dos contratos qu’axudicó a empreses venceyaes a la presunta trama de corrupción. El que ganó n’abril Veicar por un vehículu pal parque de bomberos.

El documentu afita qu’al concursu presentóse otra empresa que nos criterios oxetivos algamó menos puntuación.