Les persones con enanismu piden un pasu alantre del conxuntu de la sociedá

L'estigma ye'l mayor problema que sufre'l colectivu

Xixón acueye dende güei'l Congresu Internacional sobre Acondroplasia y otres Displasies Esquelétiques nel que se van tratar con especialistes, llegaos de delles partes del mundu, aspectos médicos, científicos y, sobre manera, el mayor problema de toos, l'estigma.

N'Asturies, hai alredor de 40 persones con enanismu. Son una minoría que nun tienen un censu oficial. La ciencia diz que suel haber un casu de cada 25.000 nacimientos. Y dende la infancia suelen soportar burlles o miraes incómodes, y eso socede caun de los díes de la so vida.

Anguaño, les persones que tienen acondroplasia son trataes con prexuicios, en munches ocasiones, y con una crueldá estereotipada. Ye un colectivu que reclama, d'una vez por toes, un pasu alantre del conxuntu de la sociedá.

Los psicólogos sociales consideren que lo más prioritario ye la construcción d'una identidá positiva dende la qu'alloñase del estigma.

El Congresu ye una oportunidá pa sentise como colectivu, pa recibir información, y pa promover la rellación ente profesionales, afectaos y families.