Les quemes obliguen a suspender les clases en más de 20 colexos asturianos

La midida afecta a Degaña, Ibias, Cangas, Tinéu y Allande

El Gobiernu asturianu suspendió güei les clases en más de 20 centros educativos de los cinco conceyos de la comarca suroccidental del Principáu, nos que tán matriculaos 2.429 alumnos, por mor de la fola de quemes rexistrada nes últimes hores en dellos puntos de la rexón.

Según informó la Conseyería d'Educación, la suspensión de les clases caltendráse tola xornada en colexos y institutos de Degaña, Ibias, Cangas, Tinéu y La Puela como midida preventiva "pa protexer la salú y el bienestar de los alumnos".

Amás, los responsables d'esti departamentu punxéronse en contactu col Consorciu de Tresportes d'Asturies pa evitar mover los autobuses nos que viaxen los alumnos pa recoyelos y llevalos a les sos cases dempués d'avisar a les families.