Llanera, de Lucus Asturum al futuru cola anovación

El conceyu foi la sede del primer parque tecnolóxicu d’Asturies y l’embrión del SEPA d’anguaño

L’asentamientu romanu del Lucus Asturum ye unu de los primeros núcleos poblacionales de la historia de Llanera. En concreto, ente’l sieglu I y el IV. Ye amás unu de los yacimientos romanos más importantes d’Asturies, y podría dicise que l’orixe de tol conceyu. Entós yá suponía un importante enllaz de comunicaciones.

A finales del sieglu XIX y entamos del XX, el conceyu medra considerablemente gracies a les sos víes de comunicación. La so situación nel mapa favoreció la xuba económica, y la creación de grandes proyectos.

En 1927 l’Ayuntamientu de Llanera cede al Estáu terrenos en Llugo pa construyir l’aeródromu de La Morgal, usáu más tarde na Guerra Civil como llugar dende onde operaba l’aviación militar.

Corsino Suárez Miranda yá escoyó esti conceyu como asitiamientu pal primer helicópteru de rescate y salvamentu que tuvo Asturies, en 1986.

Foi nel primer hangar aeropuertariu del Principáu, güei patrimoniu históricu industrial. Pero l’antecedente del Serviciu d’Emerxencies del Principáu foi’l Ceispa, vixente ente 1989 y 2001.

En 2013 créase’l SEPA d’anguaño, güei con 500 trabayadores y un presupuestu de 32 millones d’euros. Una entidá precursora en dellos ámbitos.

Centru Européu d’Empreses y Anovación

Llanera tamién ye la sede del primer parque tecnolóxicu d’Asturies. Foi inauguráu en 1991, y tres años dempués nació’l Centru Européu d’Empreses y Anovación.

En 25 años sofitó a más de 12.000 emprendedores, trabayó con más de 6.000 proyectos, y ayudó a la puesta en marcha de 1.600 empreses.

El futuru de Llanera pasa pola anovación pero ensin dexar de llau la so tradición ganadera y el so reivindicativu pasáu.